Kibrahacha – un mundu na hel

This post is also available in: Dutch, English.

Tapèit di flor koló di oro riba suela, kaminda nan ta haña un di dos bida, komo kuminda pa vruminga, lagadishi, konènchi i tambe nos biná rabu blanku.

Awaseru fuerte mei mei den luna di Aprel. Ni un siman despues tur palu di Kibrahacha ku ta den e área di awaseru ta kuminsá nan show di magia. Un extravangansa hel di flor, un oásis den e mondi shinishi i seku. Oro likidó pa tur animal ku ta kome nektar manera blenchi, barika hel, toepial, abeya, maribomba i otro animal ku gusta esaki. Un ekspreshon visual di koló lokual nos por atmirá ku asombro. Algu ku no ta dura mas ku un par di dia.

Pero no wak e flor den e palu so, pero opservá tambe e tapèit di flor koló di oro riba suela, kaminda nan ta haña un di dos bida, komo kuminda pa vruminga, lagadishi, konènchi i tambe nos biná rabu blanku.

Kibrahacha (Tabebuia Billbergii) ta un palu hopi popular na Kòrsou pa motibu di su bunitesa ora e ta floria, pa un periodo kòrtiku pero impreshonante. E nòmber Kibrahacha na Papiamentu ta pa motibu ku e palu ku e mata aki ta produsí ta sumamente duru, asina duru ku e ta kirba un hacha. Pa motibu ku nos mes palu di Kibrahacha ta floria mayoria biaha solamente den e promé mitar di aña ku eksploshon di koló hel, i no ta floria mas ku un biaha pa aña, a importá Yellow Poui, manera ta yama e palu na Inglés, di otro isla pa planta kantu di kaminda i den parkenan den siudat. Por rekonosé esnan importá na e hecho ku nan tin blachi bèrdè i flor hel pareu.

Un tesora den desierto. Tur imagen: Michelle Pors-da Costa Gomez

Kibracha lokal ta kompletamente sin blachi den temporada seku i nan tin solamente e komienso di knòpi di flor na nan taki. Esaki ta e sekreto tras di e velosidat ku e palu aki por produsí flor despues di un fuerte yobida. E knòpi di flor ta manera drumí, wardando yobida ku lo duna e palu e energia i forsa pa desaroyá e flornan. E palu lo bai invertí hopi energia den produkshon di e sigiente generashon ku e flor hel i simia. Ta solamente ora awa ta keda kai, ku e palu lo bai desaroyá blachi tambe. Si awa stop di kai, e palu ta bai den su modo di drumi atrobe te ora ku temporada di awa kuminsá i tin sufisiente energia pa desaroyá su blachinan. I ya ku mayoria knòpi ya kaba a bira flor, den e promé mitar di aña, lo no sigui un di dos ‘eksploshon’ di flor mas lat den aña.

Ta basta ‘sabí’ pa tin flor den temporada di sekura. Ku esaki e palunan aki literalmente ta forma un oásis di nektar den un situashon di desierto riba nos isla, pa asina atraé tur animal ku por yuda e palu ku su fertilisashon. No tin otro palu ku por kompetí.

Palu kargá ku flor!

Michelle da Costa Gomez

About Michelle da Costa Gomez