Konosé bo founa: Para – Deklá (Phalacrocorax brasilianus)

This post is also available in: Dutch, English.

Deklá sekando su ala den solo.

Deklá sekando su ala den solo.

Si bo sa kore pasa e planta di limpia awa sushi na Klein Hofje mainta trempan of atardi lat, tin chèns ku bo a yega di mira e para aki sintá riba e bakinan di awa ku su ala di sprèit pa seka den solo. E para aki tin e nòmber Deklá. Tambe por miranan regularmente kantu di kosta, manera na Seaquarium.
E para aki ta midi mas o ménos 60 centimeter i tin un koló skur ku ta kasi pretu. E garganta largu i tambe rabu largu ta sobresalí. Si bon tin chèns di opservá e para aki di serka bo por mira ku su wowonan ta koló bèrdè. E patanan parse esnan di patu ku e diferensia ku Deklá tin 3 flap entre nan tenchi i patu tin 2 so. E pik di Deklá tin un hak skèrpi na punta i tin un koló hel na e base. Tras di e pik tin un strepi blanku riba e kara di e para aki.

 

Deklá ta landa.

Deklá ta landa.

Deklá ta un para ku ta eksití na Sur Amerika i tambe Merka Central, ademas tambe riba majoria isla den Karibe. Na Aruba, Boneiru i Kòrsou por mira e para aki kasi henter aña pero ta na Aruba so e ta brui.
E para aki no ta bula bon so, pero nan ta landadó ekselente tambe. Ta un bista prèt pa mira nan landa ya ku nan ta saka nan gargante i kabes for di awa den un liña stret mientras tanto nan ta landa sumamente lihé. Nan ta duikdó ekselente tambe, henter na kurpa ta diseñá pa move ménos awa ku ta posibel na momentu ku nan ta duik pa kue piská. Nan por keda bou di awa basta largu.
Na Kòrsou tin vários lokalidat kaminda por opservá e animal aki. Den bahia manera Spaanse Water i Santa Martha i asta den bahia polushoná manera Schottegat por mira nan.
E para aki ta kome diferente tipo di Piská i asta sa kome Schorpioenvis. E piská aki no ta masha kerí pa landadó ya ku e tin spiña venenoso riba su lomba ku por kousa un reakshon alérgiko si bo para riba dje. I tòg Deklá sa kome e piska aki.

Michelle da Costa Gomez

About Michelle da Costa Gomez