Konosé bo founa: Para – Chipe di norte (Parkesia noveboracensis) BISHITANTE

This post is also available in: Dutch, English.

Chipe di norte na Kòrsou. Portrèt: Leon Pors

Chipe di norte na Kòrsou. Portrèt: Leon Pors

E bishitante aki ta un bista general riba nos isla, aunke mayoria hende lo no ripará ku e tei. Ta esnan ku ta opservá bon so lo rekonosé e animal aki. E para aki ta midi mas o ménos 14 centimeter. Su koló parti ariba ta maron skur, i riba su barika e plumanan ta koló krèm/hel ku strepi skur. Ademas e para tin un strepi koló krèm riba su kabes nèt riba su wowo. E komportashon kaminda e para ta para stret ku un rabu ku ta move kontinuo, ta lo ke mas ta yama atenshon. Ta e komportashon aki ta laga hende ripará ku tin un para a kaba di sali for di palu i bula abou.
Mayoria biaha por haña e animal aki den besindario di pos natural, plas di áwaseru i tambe alrededor di plantashon kaminda ta usa awa pa muha mata. E paranan ta kome insekto manera muskita ku ta biba kantu di plas de awa of pos di pia, i sa buska insekto tambe entre blachi morto riba tera.
E espesie aki tambe ta bishitá nos isla for di Nort Amérika i un kantidat chikitu lo keda aki den e periodo di wenter. Si nos haña bon áwaseru riba nos isla, por mira nan mas frekuente.

Michelle da Costa Gomez

About Michelle da Costa Gomez