Konosé bo founa: Para – Trupial Kachó (Icterus nigrogularis curasoensis)

This post is also available in: Dutch, English.

Icterus nigrogularis curasoensis

Icterus nigrogularis curasoensis

E para aki ta sinta den palu, su koló manera un mango hechu. Su koló di pluma ta kontrastá den forma briante kontra e medio ambiente koló shinishi di e mondi seku. No ta su pluma so ta remarkabel, e zonido ku e animal aki ta produsí ta mesun remarkabel. Por kompará e zonido aki ku e zonido ku kachó ta produsí. E nòmber Trupial Kachó na Papiamentu, ta referí na e zonido aki. Pero tin tiki hende ku ta konsiente ku e para aki ta un flùitdó tremendo i hopi profesional, ku por produsí un seri di kansion masha bunita, ora hende no ta wak.
Na Kòrsou nos konosé 2 sorto di para ku ta konosí kome Trupial. Esun regular ku ta oraño (Icterus icterus) i Trupial Kachó (Icterus nigrogularis curasoensis).

Un sorto ku tin un nòmber sientífiko na Latino ku tres palabra yama un su-espesie, un tipo di bestia ku ta asina diferente for di e espesie ‘original’ ku ta indiká esaki komo un espesie den proseso di kambio, ku por bira un espesie nobo. Trupial Kachó ta un para ku ta eksistí na Kòrsou, Boneiru i Aruba tambe, kaminda ta yam’é kariñosamente Gonzalito. Den e buki ‘Birds of the Netherlands Antilles’ di Voous di aña 1983 ta skirbí ku ta usa e nòmber Icterus nigrogularis curasoensis pa e para riba tur 3 isla. Aunke Trupial Kachó di Aruba tin un apariensia un tiki diferente na Aruba den komparashon ku esnan na Boneiru i Kòrsou. Den e publikashon di espesie endémiko ku a keda publiká pa A. Debrot na aña 2006 por lesa ku e animalnan ku ta pertenesé na e grupo di Icterus nigrogularis curasoensis ta biba na Kòrsou so. Pero den e publikashon mas resien di De Boer, Newton i Restall di aña 2012 tin skirbí atrobe ku e su-espesie aki ta biba riba tur tres isla.

Un nèshi tradishonal ku fibra orgániko.

Un nèshi tradishonal ku fibra orgániko.

Trahadó di nèshi artístiko

Trupial Kachó ta traha nèshi sumamente kompleho, manera saku largu ku ta posishoná na un taki fini, kaminda ta pone e webunan i ta kria e puitunan, i ku ta zuai bai bin di bientu. E nèshinan ta mes un kompliká ku makutu ku hende sa traha, pero e animal no ta usa nada otro ku su patanan i su pik pa traha e struktura aki.

E nèshi kologá ta un manera perfekto pa kria yu na un forma sigur. E entrada smal te ariba di e nèshi ta hasi esaki kasi imposibel pa penetrashon di ladron manera e trupial oraño (Icterus icterus), ku semper ta en buska di un webu of puitu. Hopi biaha ta usa e mes un lugá pa traha nèshi aña tras di aña, aunke ta traha e nèshi di nobo tur biaha. E para aki no ta brui den un nèshi di segunda mano. Ta selektá e lokalidat kaminda ta traha e nèshi ku hopi dedikashon, i e para mayoria biaha ta kis pa un área ku no ta atraé enemigu. Esaki ta strategia pa hasi e bida di ladron mas difísil ku ta posibel. Ademas ta kis pa un lugá mas sigur i moderno ku ta djis riba un kaminda asfaltá.

Pero tin ladron ku ta sabí. E espesie invasivo Shiny Cowbird (Molothrus bonariensis) no ta kome webu ni puitu di Trupial Kachó, pero e ta un bestia ku nos ta yama na Hulandes ‘parasitaire broeder’, e ta un parasit den estilo di brui. Esaki ke men ku e para pretu lombrá aki ta buska un nèshi di un Trupial Kachó den kua ya a pone webu. E cowbird ta añadí un webu di su mes den e nèshi.

Un yu ku su mama òf tata.

Un yu ku su mama òf tata.

Ora e puitunan sali for di e webu, semper esun di e cowbird ta mas grandi ku e yunan di Trupial Kachó. Ademas e yu estranhero ta hasi tur ku ta posibel pa hasi e bida di e yu di e Trupial Kachó mes hopi difísil. E pik di e Cowbird no solamente ta mas grandi, si no e koló parti paden tambe ta mas briante, lo ke ta okashoná un ‘trigger’ serka e mama pa hinka kuminda den e pik. Asina e yu di e Cowbird ta atraé tur kuminda ku e mama ta trese pa su boka. E yu di Trupial Kachó mes ta muri di hamber i e mama ta bula bai bin henter dia pa tene e yu ekstranhero na bida. Por mira mes un tipo di komportashon serka e espesie di Koekoek Oropeo, pero para lokal nunka no a mustra e tipo di komportashon aki. Ainda Trupial Kachó no a desaroyá sistema pa kombatí esaki, i e espesie ta sufri bastante bou di e invashon aki.  Hopi hende na Kòrsou ku tabata vigilá Trupial Kachó den nan kurá a opservá ku e kantidat di e Trupial Kachó den área urbano tabata bira ménos. Lamentablemente no tin sifra konkreto di e kantidat di Trupial Kachó ku tin na Kòrsou.
Hopi individual ku stima naturalesa a hasi nan bèst pa minimalisá e Shiny Cowbird riba nos isla, i tabata pone hopi atenshon riba nan den área urbano na Bándariba i tambe parti sentral di nos isla. Pero nunka no a hasi un investigashon konkreto pa inventarisá kiko tabata e impakto real di e Shiny Cowbirds, ni kiko lo por hasi pa kombatí e animal aki si en bèrdat por a midi un impakto riba Trupial Kachó.

Te ainda e Shiny Cowbird ta na Kòrsou i te ku awor nos ta haña mensahe di invashon di nèshi di Trupial Kachó. Tin biólogo ku ta premirá ku den transkurso di tempu e Trupial lo siña ku algu no ta bon ku e yu straño den e nèshi, i ku e animal lo ignorá e yu ekstranhero òf lo sak’é aktivamente di e nèshi. Esaki lo ta un desaroyo di komportashon natural ku lo trese ku ne ku e Shiny Cowbird lo no ta 100 porshento eksitoso mas den su afan di parasitá riba e instinto di kuido di otro espesie. Ta tempu so por duna demostrá si esaki lo sosodé.

Un nèshi trahá di liña pa piska.

Un nèshi trahá di liña pa piska.

Influensia moderno

Kualke dia ku bo kore riba e kaminda entre Willibrordus i Fontein, lo bo por mira na sierto kaminda algun palu ku tin taki largu ta krese riba e kaminda. Den esaki por haña por lo ménos 2 nèshi di Trupial Kachó na kada palu. Opservá e nèshinan aki si bo tin un tiki tempu, pasobra no ta e  lugá so kaminda a traha e nèshi ta úniko, e material ku a usa ta hopi spesial. E animalnan aki a diskubrí ku hende a traha material superior ku tambe por usa pa traha nèshi. Ku pida hilu di nylon i kabuya sintétiko nan a traha nèshi ku ta hopi mas duradero ku nèshi trahá ku material orgániko. Nèshi na Bándabou ta trahá ku nylon blou, i na Sint Jorisbaai e animalnan a usa hilu di piska koló blanku i bèrdè ku piskadó a laga atras.

Komedó di insekto ku amor pa fruta

Menú di Trupial Kachó ta konsistí pa gran parti di insekto, pero si nan por haña un fruta hechu  e no ta pèrdè pa gana. Djis pone un par di bakoba ku ta muchu hechu i chèns ta grandi ku un Trupial Kachó ta yega lihé pa sabore’é. Nan gusta otro fruta zut manera tampañá of Dader, mespel, mango, shimaruku i oba tambe. Ademas simia tambe ta forma parti di nan dieta, i si nan por haña pan tambe nan lo komé.
Tempu di sekura ta un temporada sumamente difísil pa e bestianan aki. I awor ku ta desaroyá mas i mas área, kaminda ta destrosá palu i otro mata indígena, ku ta produsí hopi fruta den tempu di sekura, para en general ta haña nan mes konfrontá ku skarsedat di kuminda, i Trupial Kachó no ta eksepshon den esaki.
Ta p’esei lo no ta mal idea pa pone un lugá disponibel den bo kurá kaminda por pone restu di fruta ku ta atraé insekto, i tambe un baki ku awa pa asina yuda para en general na Kòrsou. Banda ku bo ta yuda, lo bo eksperensiá momento natural sumamente bunita.

Michelle da Costa Gomez

About Michelle da Costa Gomez