Reforestashon na Klein Boneiru

This post is also available in: Dutch, English.

Yu di Kadushi rondoná di piedra di kalki.

Yu di Kadushi rondoná di piedra di kalki.

Ta rondoná un yu di Kadushi (Cereus repandus) ku hopi amor ku pida piedra di kalki pa asina krea un tiki fresku, i tambe un lugá pa wanta awa bou di e solo fuerte i kalor intenso riba Klein Bonaire. A transplantá e mata aki for di un lugá riba e isla prinsipal, kaminda e mata no tabata deseá mas, pa e lokalidat kaminda ku tempu e tin ku krea un populashon nobo di kàktús. E mata chikitu ta pertenesé na un proyekto di reforestashon ku mester trese e vegetashon original i diverso di Klein Bonaire bèk atrobe. Den e proyekto aki, ta pone énfasis riba rekuperashon di naturalesa pa su forma original, kaminda un variedat grandi di mata i palu skars ta haña un lugá i asina tambe e chèns di forma populashon stabil pa asina na nan turno ta un fuente ku ta atraé espesie di animal manera barbulètè i para pa e isla chikitu.

Mapa di e área kaminda ta ehekutá e proyekto.

Mapa di e área kaminda ta ehekutá e proyekto.

Reforestashon ku diferente fase

Te ku un 40 aña pasá un kantidat grandi di kabritu tabata kana lòs riba e isla ku ta situá nèt dilanti di kosta sur di Boneiru. E bestianan aki tabata kome tur e vegetashon ku ya kaba tabata basta skars pa motibu di kitamentu di mondi riba e isla den tempunan kolonial. E kabritunan no tei mas awendia i e isla ta un destinashon popular pa rekreashon pa motibu di e playa largu ku santu blanku i fini, i tambe pa konservashon danki na turtuga di laman ku ta traha nèshi riba e playa, diferente para migratorio ku ta bishitá e isla, i otro elemento di naturalesa di Boneiru.
E trabounan di reforestashon a kuminsá na aña 2006 ora biólogo Dolfi Debrot a planta e promé sèt di mata skars den tera. Na aña 2008 i tambe 2010 a bolbe organisá seshon di plantamentu di mata skars riba e isla.

Elsmarie ta ilustrá e sistema di manehá awa ku ta apliká na Klein Bonaire.

Elsmarie ta ilustrá e sistema di manehá awa ku ta apliká na Klein Bonaire.

A planta un par di shen mata den e promé periodo, i for di luna di mei te ku òktober 2013 a planta mas ku 220 mata den tera di Klein Bonaire, kaminda e trabou di Wardakosta tabata krusial ya ku nan a koba e burakunan den e klep duru boluntariamente. E organisashon ku ta manehá e proyekto aki, Stinapa Bonaire, a kambia di e strategia ku mester planta mata yòn den sombra di palu mas grandi. Awor ta planta e matanan tambe mei mei di e paisahe ekstenso di e isla, i ta duna e matanan awa regularmente, Esaki ta sosodé ku un sistema di maneho di awa, for di e ‘basecamp’ ku ta situá serka di kosta di e isla. Bou di un nèt di kamuflahe tin un kantidat grandi di tas den kua tin bòter di plèstik, un tanki grandi ku ta yená ku awa ku ta bin di tera firme, un kantidat di sombré i banki pa sinta ariba. Ta yena e bòternan un pa un i kada mata ta haña un bòter ku awa regularmente, wardando tempu di yobida.

Kangreu ta ataká

Huntu ku Elsmarie Beukenboom di Stinapa Bonaire, nos a bai tira un bista na Klein Bonaire den luna di òktober 2013. E entusiasmo tabata masha grandi ora nos a topa un blachi nobo nobo na un stèk di palu di Sia Blanku (Bursera karsteniana). I asta e blachi aki ta tin un mordé chikitu. No ta konosí kua bestia a tribi di kome un pida di e blachi. Por ta un lagadishi, Elsmarie no a yega di mira yuana ainda riba e isla, òf un kangreu.

E blachi di Sia Blanku ku komé.

E blachi di Sia Blanku ku komé.

Ta parse ku kangreu di Klein Bonaire no tin muchu amor pa e proyekto di reforestashon di e isla. Un di e yu di kadushi ku a planta un par di dia promé, a keda tirá un 40 centimeter mas leu for di su lokalidat original kaminda a planta e mata. Elsmarie ta konta ku no ta promé biaha ku esaki ta sosodé, i e tin e idea ku e populashon di kangreu den e área no gusta mata deskonosí den na teritorio. Ku violensia ta saka e matanan for di tera i ta tira nan un banda. Ta un proseso kontinuo pa wak unda e kangreunan si ta tolerá plantamentu di e matanan.

Un par di luna despues di nos bishita na Klein Bonaire, Elsmarie a manda nos un kantidat di portrèt kaminda por mira un par di shen kangreu den grupo huntu despues di un bon yobida.

Yalena banda di un palu di Mata Piská ku a planta na ana 2010.

Yalena banda di un palu di Mata Piská ku a planta na ana 2010.

Historia di éksito

No ta tur kos ta bai malu ora ta planta e matanan den e tera difísil di e isla. Tin diferente opservashon ku ta demostrá e éksito di e proyekto aki. Un ehèmpel ta un Mata Piska (Jacquinia arborea), ku a planta na aña 2010 i ku a krese bastante den e temporada ku a pasa. Un otro ehèmpel ta e populashon di palu di Kalabarí (Zanthoxylum flavum), un tipo di palu sumamente skars pero ku na e momento ei tabata karga un kantidat grandi di simia. Tambe e palu di Watakeli (Bourreria succulenta), ku ta kargá ku fruta. Ta Debrot a planta e palu aki na 2006. “E produkshon di flor i simia ta hasi e área di biba pa insekto i para hopi mas amplio”, Elsmarie ta konta nos ku orguyo i na mes momento e ta chek un yònkuman ku ta kore ku un ‘water gun’ den un área kaminda un par di dia promé a planta diferente mata chikitu.
Kalabarí ta un tipo di palu sumamente skars pa motibu ku ántes, den tempu di kolonialismo, a kap e palu aki pa traha diferente kos ku ne. Na Kòrsou e palu aki ta mas skars ainda. No ta straño ku e simianan ku e palunan aki tabata produsí na e momento ei a keda kosechá ku masha koutela, pa asina por sembra nan pa kria e siguiente generashon ku tambe lo planta riba e isla i asina garantisá e sobrebibensia di e espesie aki na Boneiru i Klein Bonaire.

Fruta i simia di Kalabarí.

Fruta i simia di Kalabarí.

E historianan di reforestashon eksitoso aki ta un ehèmpel pa region Karibe i ta ilustrá ku si invertí kuido, amor i hopi pasenshi, por yuda naturalesa na un manera benefisioso.

 

 

 

 

 

 

Michelle da Costa Gomez

About Michelle da Costa Gomez