Un raton chikitu misterioso

This post is also available in: Dutch, English.

Un raton di kas chikitu ku a kaba di kai den awa di turtuga di awa dushi.

Un raton di kas chikitu ku a kaba di kai den awa di turtuga di awa dushi.

Espesie humano, Homo sapiens, humano ku ta pensa, a plama rònt mundu danki na gran kantidat di invenshon. Na pia, ku barku, i mas resien ku avion. Kasi no a sobra un lugá, riba tera, na mundu kaminda hende no a yega di kana. Área virgin kasi no ta eksistí mas.
Ademas di esaki Homo sapiens tin e tendensia fèrfelu i persistentemente pa biaha ku stowaway. Sea ta trata di espesie di mata ku ta kompañá humano den forma di simia òf espesie di animal ku a adaptá nan stail di bida di tal forma ku tur proseso di bida ta tuma lugá den proksimidat di hende, konsientemente of inkonsientemente humano kasi nunka no ta biaha su so.

Stowaway

Historia di hende ta yená ku ehèmpel di animal ku, deseá of indeseá, a biaha huntu ku e humano durante biahe di deskubrimentu i a keda introdusí na pais kaminda nunka nan to tabata eksistí.  Konsekuensia di esaki por ta desastroso pa ekologia di pais nobo kaminda e stowaway ta yega. Ken no konosé e ehèmpel di e para Dodo riba e isla Pasífiko Mauritius? Na Hulandes e para aki tabata tin e nòmber ‘Walgvogel’ i tabata smak hopi malu. A pesar di esaki a kome e bestia aki na gran eskala , pero so ekstinshon tambe ta debí na introdukshon di espesie invasivo manera djaka i raton, ku a kome webu di e para aki i tambe su puitunan. Den tempu rèkert populashon di Dodo a keda destruí, i huntu ku e para aki un gran kantidat di otro espesie di para tambe, riba otro islanan kaminda Europeo a pone pia riba tera pa promé biaha.

Raton di kas… habitante di mundu henter

Raton di kas, e raton ku ta okashoná gritamentu formal ora hende mir’é bula for di kashi of ora e bestia kana riba un rùst den kas, mayoria biaha ta biba den ambiente direkto di hende. E espesie aki ta prosedente di Euro-azie, pero a distribuí rònt mundu danki na hende ku a introdusí nan. Por haña grupo grandi den mangasina i otro lugá kaminda nan por haña kuminda. Ademas nan ta biba den área di agrikultura kaminda tin veld grandi di produkto di   agrikultura.
Raton di kas (Mus musculus) ta un omnívoro. Esaki ke men ku e bestia aki ta kome material vegetal manera simia, grano, fruta i blachi i tambe animal manera insekto i bichi. Ademas nan por kome webu di para.
Ekspanshon di Mus musculus ta masha variá na lokalidat. Na Estádos Unídos e teoria awor aki ta ku e animal aki a keda introdusí den temporada di Revolushon Merikano. Na Kòrsou ta presumí ku e espesie a yega na momento ku e promé barku Europeo a yega nos isla.
Den buki históriko ta menshoná raton di kas regularmente pa motibu ku e bestia tabata un plaga i tabata kousa hopi daño pa hende. Kaminda ta planta Maishi Chikí hopi biaha ta tin molèster di raton ku tabata kome maishi. Den mangasina kaminda ta warda kuminda pa tempu difisil, raton tabata kousa daño masha grandi.
Te ku awor hende tin rabia riba raton pa motibu di e daño ku nan ta kousa den área di agrikultura, mangasina kaminda ta warda kuminda, nos kashi di kushina den kua nan ta kou na tur kos ku nan por haña en buska di kuminda i material pa traha nèshi. Pero tambe pasobra nan ta pupu i pishi riba tur kos i si bo no paga tinu ta traha nan nèshi den bo albùm di portrèt.
Hende a bira apto den invenshon di un kantidat di produkto ku mester yuda kombatí e animal aki den área direkto di humano, pero te ku awor sin resultado.

Konfushon

E spesimèn original di en djaka di caña na  Naturalis.

E spesimèn original di en djaka di caña na Naturalis.

Mayoria hende riba nos isla ta pensa riba e raton di kas na momento ku menshoná e palabra raton. Tiki hende sa ku Kòrsou tin su mes espesie di raton indigino ku kasi nunka no ta biba den proksimidat di hende. Ta trata di un raton misterioso i chikitu ku pia blanku. Na Hulandes ta yam’é Dwergwitvoetmuis (Calomys hummelincki) (djaka di caña ta e palabra ku kisas ta usa na Papiamentu).

Djaka di caña

A diskubrí Djaka di caña pa promé biaha na Kòrsou na St. Thomas College, Plantage Jongbloed na aña 1945. Segun e buki ‘Zoogdieren van de Nederlandse Antillen’ skirbí pa Pieter Wagenaar Hummelinck, a haña restu di e animal den e balanan ku Palabrua ta saka, den besindario di Savonet. Na Aruba Pieter Wagenaar Hummelinck a diskubrí e raton aki na aña 1930 na Seroe Blanco i Baranca Corá.
Pero a tarda basta promé ku sientífiko a realisá ku ta trata di un espesie diferente for di raton di kas, i ta solamente ora a bai opservá e spésimen mas profundo ku sientífiko a bin ta realisá ku ta trata di un espesie kompletamente diferente. Na e momento ei a realisá ku e djaka di caña tin karakterístika kompletamente diferente for de raton di kas. djaka di caña ta mas chikitu i ta midi solamente 6 cm, kaminda raton di kas ta midi 8 cm. Ademas di esei e rabu di djaka di caña ta mas kòrtiku ku e largura di su kurpa. E rabu di raton di kas ta mes un largu of asta mas largu ku e midí di su kurpa. I tambe e rabu di djaka di caña di un kuashi blanku na e punta, un kos ku raton di kas no tin. Otro karakterístika ta ku e pianan patras di djaka di caña ta mas chikitu ku esun di raton di kas. I e pianan ta tapá ku lana será koló blanku. E animal mes ta koló maron kla ku un tiki hel den su lana.

Dwerghamster ambe ta famia di djaka di caña.

Dwerghamster ambe ta famia di djaka di caña.

Un animal misterioso

Djaka di caña a keda deskribí ofisialmente komo espesie pa nos isla, pero mi no tin niun idea si e bestia aki ta eksistí ainda aki. Ya ku mayoria hende no ta wak mas leu ora nan mira un raton, dat posibel ku raton ku ta opservá den área rural no ta raton di kas sino djaka di caña. E animal aki no gusta biba den área kaminda hende ta biba, pero ta posibel ku nan ta kome Maishi Chikí of otro grano si.
Un par di aña pasá Kòrsou tabata anfitrion di un sientífiko ku a bini nos isla spesial pa buska e animal misterioso aki. Despues di vários siman den field, kaminda e a gara un kantidat di raton, e no a haña ni un djaka di caña. E sientífiko a bai kas bèk ku man bashí.

Djaka di caña manera e ta pintá den e buki 'Zoogdieren van de Nederlandse Antillen' door Pieter Wagenaar Hummelinck

Djaka di caña manera e ta pintá den e buki ‘Zoogdieren van de Nederlandse Antillen’ door Pieter Wagenaar Hummelinck

Ta posibel ku e espesie aki ta eksistí ainda den área kaminda hende no ta yega fásil ku su trampa, venenu i pushi. Pero nos no tin niun prueba pa e konklushon aki. Un yu di Kòrsou chikitu i misterioso. Mi ta spera di tin e chèns di enkontrá e animalito aki maske ta un biaha. Lo ta hopi dramátiko si nos mester inkluí e espesie aki tambe riba e lista, ya kaba ekstenso, di animal i  mata ku a keda ekstinguí pa motibu di humano.

 

 

 

Michelle da Costa Gomez

About Michelle da Costa Gomez