Mi introdukshon den Caribbean Footprint i naturalesa di Kòrsou

This post is also available in: Dutch, English.

Un tipo di Passiflora

Un tipo di Passiflora

Laga mi kuminsá introdusí mi mes. Mi nòmber ta Nik Voorend, i mi ta un studiante di 23 aña ku ta studia International Communication Management i ku a yega Kòrsou pa kore stage serka e fundashon Curaçao Footprint Foundation, ku ta konosí pa e online magazine Caribbean Footprint. Den e sinku luna benidero mi lo skirbi regularmente pa Caribbean Footprint pa medio di mi mes blog. Den e blog mi lo kompartí mi eksperensia ku Kòrsou, i prinsipalmente e tempu ku mi lo traha na Curaçao Footprint Foundation. Mi lo skirbi tokante diferente persona ku mi lo traha kuné, tur kos interesante ku mi lo mira, e historianan ku mi lo tende i tur kos ku ta pasa ku ta impreshoná i duna mi inspirashon. I tambe naturalmente tokante e tempu ku mi lo pasa den naturalesa di Kòrsou.
Mi no ta un ensiklopedia mobil manera Leon Pors i Michelle da Costa Gomez, i mi no tin un background den biologia ni geologia, pero mi ta disfrutá ampliamente di naturalesa. E motibu prinsipal ku a pone mi bini aki, na Kòrsou i na Curaçao Footprint Foundation, ta ku mi ta inmensamente motivá pa diskubrí, pa mira kos nobo i siña kos nobo. Pa medio di e blog aki mi ta spera di por kompartí mi eksperensianan di e siguiente 5 luna ku bosnan, i mi ta spera di kontagiá bosnan ku e vibe positivo ku ya kaba a tuma rumbo den mi mes.

Dobla kurpa pa e potrèt perfekto.

Dobla kurpa pa e potrèt perfekto.

Fotografia den naturalesa

Sufisiente tokante mi mes (pa awor), laga mi kuminsá ku mi blog. Pa mi promé kontribushon mi ke konta bosnan tokante mi promé introdukshon berdadero ku e naturalesa di Kòrsou, djasabra último durante e kaminata di saka portrèt di naturalesa na Parke Kristòf. Michelle i Leon a guia ami, i huntu ku mi 13 otro amante di fotografia sumamente motivá pa un área den parke ku normalmente ta será pa bishitante i kaminda djis un kantidat chikitu di hende lo tin e privilegio di bishitá.
Nos a kuminsá mas parti abou den parke, ku e tarea di bai en buska di koló den naturalesa. Den mi bida mi a bishitá un gran kantidat di parke nashonal masha bunita, pero niun di nan mi no a yega di eksperensia na e forma aki. Atenshon pa detaye tabata e yabi di éksito pa saka portrèt iregular i masha bunita. Mirando den mi alrededor, mi no a mira solamente koló, pero tambe mi por a opservá e otro partisipantenan den posishon masha variá pa asina por saka e imágen perfekto. Tabata fenomenal pa ta rondoná dor di un grupo di hende asina entusiasmá, ku tabata disfrutá di e paisahe na mes un manera ku mi mes ta hasi. I lo ke tambe tabata great ku nos ta tin e guia di dos hende ku masha hopi konosementu di naturalesa, ku ta Leon i Michelle. Ku un kantidat di portrèt ku ya tabata nèchi i ademas un tiki training ku e kámara, nos a drenta outo pa kore bai na un área un tiki mas altu den parke.

Unifikashon total ku naturalesa.

Unifikashon total ku naturalesa.

Despues di un stòp kòrtiku na Seru Gracia, kaminda nos a disfrutá di e bista inmenso, e úniko palma indígena di Kòrsou, e flor kolorido di Yerba di Glas, diferente koló straño pero masha bunita riba baranka i orkidia salbahe, nos a sigui kore pa yega na e punto di komienso di e kaminata kòrtiku pa Seru Bientu. Aki nos por a disfrutá di un almuerso sukulento, pa despues kuminsá ku e kaminata bai ariba.
E punta di e seru a kumpli ku promesa di e nòmber Seru Bientu, ku un bientu sumamente fuerte ku tabata mustra e poder inmenso di naturalesa. Kaminda e bientu tabata e kandidato mas lógiko pa bula tira nos un banda, un otro kos a logra esaki promé ku e bientu: e bistanan!
Nunka mi no por a imaginá ku Kòrsou lo tin e tipo di bista aki. Mondi bèrdè, tur kaminda rondó di nos, ku su tras: laman. Un postkaart, kla pa manda ku post.
Ta bon ku nos a práktika na kuminsamentu di e trip aki pa pone atenshon na detaye, pasobra aunke e tentashon pa saka portrèt di e bistanan so tabata grandi, e tarea pa fotografia e bunitesa di kosnan chikitu tabata motivá nos pa sigui diskubrí detaye.

Kaku ta "pose".

Kaku ta “pose”.

Na kaminda pa bai bèk ma kòmbersá ku algun otro partisipante tokante e bistanan, nos portrètnan faborito i e bunitesa en general ku e dia aki a trese. 8 ora despues ku nos a kuminsá, nos tabata na kaminda pa bai bèk e punto di komienso. E resultado di e dia aki: 517 portrèt, pia kansá, un kamisa sodá i un kara kimá (siña di mi fayo shonnan i trese sunscreen). Pero lo ke mas ku tur kos ta e resultado di mas grandi, ta ku mi tin hopi gana di siña konosé e isla bunita aki mas di serka.