Konosé bo founa: kokolishi

This post is also available in: Dutch, English.

Common purple snail/ Paarse zeezeiler (Janthina janthina)

Janthina janthina

Janthina janthina

Blou lila skars

Na aña 1758, e sientífiko Linnaeus a duna e nòmber sientífiko Janthina janthina na un kokolishi i e habitante den dje ku ta sumamente chikitu i ku koló blou i lila. Na Papiamentu no tin nòmber pa e animal aki ku ta biba rònt mundu den laman tropikal. Na Hulandes ta yam’é  Purperen òf Paarse zeezeiler i na Ingles ta yam’é Common purple snail.

E kokolishi aki no ta skars, pero e koló ku e animal aki ta produsí pa su kokolishi i su kurpa si ta skars i remarkabel. Tin tiki kokolishi na mundu ku tin un koló blou of lila, i pa e motibu aki e kokolishi aki ta sobresalí. Mas ainda si bo ta haña e chèns di opservá imágen makroskópiko di e kokolishi kaminda bo por mira e patronchi fini riba e kokolishi hopi bon. E kokolishi ta rondó i fini, i por bira mas o ménos 4 centimeter altu i 3 centimeter anchu. Ademas e ta asina frágil, ku un hende ku ta han’é mester anda poko poko pa no krush e kokolishi. E slak mes tambe tin e koló lila, i riba su kabes e tin un boka silíndriko largu .

Un pintura históriko ku ta mustra e flota trahá di sleim

Un pintura históriko ku ta mustra e flota trahá di sleim

Slak ku ta drif

E animal aki ta un siudadano di mundu. E no ta biba na un lugá fiho den laman, lo ke hopi slak sa hasi, pero e espesie aki ta biaha bai di un lugá pa otro. E nòmber popular na Hulandes, ‘Paarse zeezeiler’. ya kaba ta indiká su komportashon. E manera kon e animal ta move riba superfisie di laman ta hopi partikular. Janthina janthina ta drif na superfisie di laman kaminda e por keda drif danki na un tipo di flota, trahá di skuma ku e bestia mes ta produsí i ku ta pegá na otro ku un tipo di sleim ku ta kontené e supstansia ku yama chitine. E supstansia aki ta keda produsí den e kueru di e pia di e slak, parti abou di e bestia. E kokolishi no ta landa sino drif pa medio di e pakete di skuma ku solamente por produsí na superfisie di laman.
Bou di influensia di koriente den laman i bientu nan ta move bai, entretantu en buska di kuminda manera plankton i pika pika chikitu, di kua tambe Pèchi Portugues chikitu ta forma parti. E organismo aki tambe ta drif na superfisie di laman. Ta pa motibu ku Janthina janthina ta sensitivo pa bientu, ku e chèns ku bo por haña e kokolishinan riba playa ta mas grandi despues di un periodo di laman brutu i bientu fuerte.

Un ehemplar ku a subi playa na Wawaii (Wikipedia commons)

Un ehemplar ku a subi playa na Wawaii (Wikipedia commons)

Vivipare

Ta konsiderá Janthina janthina komo vivipare pa motibu ku tur webu ku e hembranan ta produsí ta sali den e trakto seksual pa despues bandoná esaki. E proseso reproduktivo no parse esun di mamífero na niun manera, ya ku e machunan no tin pénis. E sélula di spèrma ta landa bai den direkshon di e hembra pa asina haña akseso na e trakto seksual di e hembra, pa por fertilisá e webunan.

 

 

 

 

 

Michelle da Costa Gomez

About Michelle da Costa Gomez