Invisibel sinembargo indispensabel

This post is also available in: Dutch, English.

Airu

Kiko ta airu? Hopi bia nos ta tende hendenan ta papia i bisa: ‘ta hole dushi!’, ‘akinan ta hole stinki!’, ‘airu seku ta bon pa isolashon’ òf ‘laga nos ban chèk e preshon di e tayer di outo’. Sinembargo esakinan ta trata solamente algun karakterístika di airu.
Airu, riba planeta tera, ta konsistí di 78% gas nitrógeno i 21% gas oksígeno. E 1% ku ta sobra ta konsistí di un kombinashon di gasnan noble, vapor i karbondioksido ku konstantemente ta kambia  di konsentrashon. Pues den kòrtiku nos por bisa ku airu ta un meskla di diferente gas. Dor di diferensianan den preshon e meskla aki ta kuminsa move i nos por sinti bientu.
Airu ta proveé tur kriatura bibiente di oksígeno i ta transporta tur gas ku nan saka bèk for di nan sistema hiba na e ‘kambernan pa laba gas’ ku tin riba mundu. Nos areanan bèrdè! Sin airu, bida lo no tabata posibel riba mundu. Di mes manera, mal kalidát di airu ta sòru pa deteriorashon di salú humano. I no di humanidát so, pero e mundu di mata i bestia tambe ta haña su mes konfrontá ku desafionan grandi pa por keda na bida.

Un rosea tóksiko

Aktividátnan humano lastimamente por tin konsekuensianan negativo pa e kalidát di nos airu. Nos ta papia di polushon di airu na momentu ku e kalidát di airu a wòrdu afektá di tal manera ku e relashon entre e gasnan ku ta forma airu ta sali for di nan balansa natural. E relashon entre gasnan ta sali for di balansa prinsipalmente na momentu ku gasnan kontaminante wòrdu añadí na e airu. E gasnan kontaminante mas konosí ta nitrogeno oksido, ‘zwaveloxide’, ‘Vluchtige Organische Componenten (VOC’s) i stòf fini (PM10).
E orígen di e gasnan manera stòf fini, nitrogeno oksido, monoksido di karbon, ‘koolstofdioxide’, ‘zwaveldioxide’ i VOC’s, ku ta kontaminá airu na Kòrsou por wòrdu hañá den e kadena di prosesonan industrial den kua kombustibel ta wòrdu kimá. Trafíko di vehikulonan motorisá no ta forma un eksepshon. Den areanan kaminda tin kuido di bestia intensivo i/o plantashon i areanan kaminda awa ta wòrdu purifiká segun metodonan konvenshonal tin un emishon basta haltu di gas metano ta tuma lugá. Rondo di pòmpnan di gasolin e emishon di ‘benzeen’ ta esun ku mas ta resaltá.

Un otro proseso pa medio di kua e gasnan ku ta forma airu ta wòrdu saká for di balansa ta ora ku nan konsentrashon mes kuminsa varia sin ku gasnan kontaminante a bin aserka. Kambionan aisnaki tambe ta sòru pa deteriorashon di e kalidát di airu.

Bou di influensia di wer, temperatura, solo i awaseru e gasnan kontaminante ku wòrdu emití ta wòrdu tranportá, hasí inofensivo, saká for di airu (pa medio di awaseru) òf kambiá den un otro gas (inofensivo). Airu tin e kapasidát pa apsorba un sierto kantidát di gasnan kontaminante i hasi esakinan inofensivo dor di kambia nan den un otro gas òf pa medio di difushon. Lastimamente e kantidat di gasnan kontaminante ku ta wòrdu emiti aktualmente ta asina haltu ku e bufer natural lo mester tra ora èkstra pa por tene tur kos bou di kòntròl. Nos bufer tawaterstofsulfide sufri di un burn-out kroniko.

Pa nos por haña un bista mas representabel di e gasnan kontaminante ku tin den e airu na Kòrsou nos a buska resultadonan for di e stashon ku ta midi esakinan na Kas Chikitu i Beth Chaim. E resultadonan ta basa riba 30 dianan den yüni – yüli 2013. Pa un miho komprondementu di e datosnan a pone e normanan pa airu stipulá i implementa dor di Oropa i Hulanda den tabla mas abou. País Kòrsou no a stipulá ni implementa niun norma pa regula e emishon di gasnan kontaminante.
Tur e datosnan a wòrdu di download for di e wèpsait  www.luchtmetingencuracao.org riba 26 juli 2013.

tabel-papFuente: F.M.W. de Jong, Luchtnormen voor 31 prioritaire stoffen, RIVM Rapport601357003/2011 en Richtlijn 2008/50/EG.

Cincopa WordPress plugin

Sin duda algun por wòrdu konkluí, abase di e datosnan, ku na ambos sitio di monitoring nos por papia di un ekseso sumamente pisa di e limite aseptabel pa emishon di gasnan kontaminante. Banda di e echo ku e emishon di ‘zwaveldioxide’ ta surpasá e limitenan kasi diariamente nos por bisa ku na e piknan e konsentrashon ta surpasa e limite pa mas ku 30 bia na Beth Chaim. Meskos ta e kaso tambe pa TSP. TSP ta para pa Total Suspended Particals i ta wòrdu usá pa determiná e kantidát di stòf fini ku a wòrdu emití. E resultadonan na e stashon di Kas Chikitu ta duna e mesun bista. Ku adishon di e gas ‘waterstofsulfide’ ku tambe a wòrdu midí den transkurso di e 30 dianan.

Konsekuensianan di mal kalidat di airu

Porta bo ta pensa aworaki, lo ta! Ami no ta ripara nada di e polushon aki, mi no ta hole nada straño. I ta kiko tur e nòmbernan, formulanan i gráfikonan aki tin di haber ku mi? Pa e simpel echo kaba ku un persona kontinuamente ta wòrdu ekspone na airu, sea ku e ta den kas, outo òf djis kanando pafó mester lanta un sentido di deseo di por dispone riba airu limpi. Pa dia un persona, bou di sirkumstansianan trankil ta usa 11.532 liter di airu, djis halando rosea. (int. Health/howstuffworks.com, 27 juli 2013) Kada persona pues ta usa un kantidát di airu ekivalente na 298 kònteiner di karga pa dia.

Pues, mal kalidát di airu sin mas ta un peliger pa salú di e ser humano. Tambe e biodiversidát pues nos flora i fauna no ta skapa di e konsekuensianan di e eksposishon kontinuo na gasnan kontaminante. Komo ku e stashonnan a detektá solamente e gasnan ‘zwaveldioxide’, stòf fini i ‘waterstofsulfide’ durante e último luna, den e siguiente artíkulo nos ta bai trata solamente e konsekuensianan ku e gasnan akí tin pa e ser humano i su medio ambiente.