Konosé bo founa: Para

This post is also available in: Dutch, English.

Aruba, Boneiru i Kòrsou tin un diversidat riku di flora i founa i e kantidat di hende ku ke sera konosí ku e diversidat aki ta krese tur dia. Lo ke ántes tabata interpretá komo laf i sin importansia awor poko poko pero sigur ta interpretá komo e herensia natural di e islanan ku mester respetá i kuida. Caribbean Footprint Magazine lo bai pone atenshon riba e diversidat di tur tres isla pa medio di artikulo di espesie individual.

Un Mofi machu

Un Mòfi machu

Un komedó di simia no muchu partikular (A+B+C)

E avifouna di Aruba, Boneiru i Kòrsou, mihó bisá e espesie di para ku islanan konosé, tin diferente para ku ta kome simia i esun ku hopi biaha ta lubidá riba dje ta e Mòfi (Tiaris bicolor) manera ta yam’é na Papiamentu. E para aki no tin hopi koló, den sentido ku e no tin koló tropikal. Pero esun ku ta opservá e animal aki mas di aserka por mira ku su koló no ta laf. E pluma di e para tin un koló maron-bèrdè ku ta varia di individuo pa individuo. Mòfi ta un di e tiki paranan riba nos islanan di kua e ta bastante fásil pa distinguí hembra for di machu. Machu tin un kabes koló pretu i ta en general mas skur ku un koló manera bèrdè oleifi. E hembra tin un koló shinishi.

Un hembra

Un hembra

Den pasado Mòfi tabata biba tur kaminda na Kòrsou i por a opservá nan tambe den área urbanisá kaminda e para tabata buska su kuminda ku ta konsistí prinsipalmente di simia, manera simia di kàktùs.

Awendia e animal aki ta birando hopi skars na Kòrsou i tin e impreshon ku ta debí na e introdukshon di e espesie invasivo ku yama Saffraanvink, e deterioro den e kantidat di Mòfi ta tuma lugá. Saffraanvink no solamente ta kome mes un tipo di kuminda, pero ta mas agresivo tambe ora nan buska kuminda. E animal aki ta biba hopi biaha den grupo grandi ku ta konsistí di adulto i animal yòn. Mòfi ta biba den grupo mas chikitu ku hopi biaha no por bringa kontra invashon di grupo grandi di Saffraanvink.

Un Saffraanvink, ku kisas tin un impakto riba e Mofi

Un Saffraanvink, ku kisas tin un impakto riba e Mòfi

No ta konosí ki ta estado di e kantidat di Mòfi na Kòrsou i Boneiru, pasobra simplemente nunka no a hasi investigashon na e kantidat di para ku ta biba riba e dos isla, i pa e motibu aki no por determiná deterioro di e espesie statistikamente. Na Aruba a organisá un Survey Nashonal di para na aña 2011. E resultado di esaki a keda presentá pa Centraal Bureau van de Statistiek na Aruba i publiká den un dokumento ofisial. E datos a keda registrá pa voluntario. Den e konteo aki Mòfi a resultá na di 5 lugá di para ku a wak mas tantu durante e konteo, ku un kantidat di 2425 individuo.

Neshi di un Mofi den un Infrou

Neshi di un Mòfi den un Infrou

Traha nèshi

Mòfi ta traha nèshi rondó, trahá di yerba. Por haña e nèshinan den mata di Infrou i otro mata ku sumpiña i tin biaha riba suela. Mayoria biaha tin 2-4 yu den e nèshi.

Pleitamentu ku imágen den spil

Tin biaha hende por opservá e Mòfi na momento ku e ta manera baila ku su imágen den spil di outo. Mayoria biaha ta e machu ku ta hasi esaki. Den e imágen den spil nan ta mira un rival ku potensialmente por ta un peliger pa nan teritorio. Mester saka e rival aki for di e teritorio mas pronto posibel.

Michelle da Costa Gomez

About Michelle da Costa Gomez