SIENTIFIKONAN LAIKO, NOS TIN MESTER DI BO!

This post is also available in: Dutch, English.

Bo ke partisipá den nos estudio?

E pregunta ta:  kua bestia ta habri frutanan no-hechu di datu, kadushi i kadushi pushi?

mofi feeding on kadushi fruit

un mofi disfrutando di e simía di un fruta di kadushi

Historia:

Dr. Sophie Petit a studia datu, kadushi, kadushi pushi i raton djanochi na Kòrsou pa 24 aña.  Parti di su estudio huntu ku Leon Pors and Anna Rojer ta mustra ku masha poko fruta ta haña oportunidat di hecha i habri.  Sierto bestia ta habri i kome nan promé ku e simianan ta kla pa sprùit – e bestianan akí simplemente ta kome pa kaba ku e kaktusnan!  KUA BESTIA TA HABRI E FRUTANAN NO-HECHU AKI?  Yuda nos pa revelá e sekretu aki.

Loke bo tin mester:

binokulario, pèn i papel, e formulario (klèk aki pa e formulario, i klèk aki pa un ehempel di un formulario yená), un lugá kaminda bo por opservá datu, kadushi òf kadushi di pushi (bo tin suerte si nan ta krese den bo kurá), un buki di para, algu di kome-awa-sunscreen-ko’i tapa kabes-algu pa sinta riba dje p.e. kama di pushi, poko tempu liber i lo tabata hopi bon si bo tin un kámera ku un tele-lens riba dje (pero no obligatorio).

Loke un opservadó mester sa di e frutanan:

ora un fruta ta hechu (5-6 siman pa datu i kadushi), e ta hincha i ta sker habri.  Fruta di datu (dader) ta kuminsá lombra pisá i ta pèrdè su sumpiñanan djis promé.  Kaska di fruta di kadushi (tampañá) ta bira hopi fini kaminda e ta bai sker, mas parti esei ta sosedé parti abou dje fruta.  Raton djanochi por yega na e parti di kome paden, solamente ora e fruta ta habrí; un kantidat grandi di simia pretu chikitu ta kla pa sprùit e ora ei i raton djanochi ta nan distribuidó.  Tin ora un dader ta kuminsá lombra i pèrdè su sumpiñanan ora un bestia ta habri’é promé ku e hechu. Pa e motibu ei i mirando meta di e estudio akí, ta masha importante, ku bo sa sigur ku e frutanan no ta hechu (uza fruta di grandura chikitu te mediano pa un sierto kaktus).  Nota ku simianan por spruit for di un siman promé ku e fruta ta habri. Ta pesei ta asina importante den e estudio akí, ku nos sa sigur ku e fruta no ta hechu.

Método:

por fabor sinta ku bo binokulario por lo ménos 10 m leu for dje kaktùs òf grupo di kaktùs.  Raportá tur bestia vertebra ku ta bishitá e kaktus i ku ta bon visibel. E kos mas IMPORTANTE TA KU BO TA NOTA SI E BESTIA EN KESTION TA HABRI E FRUTA OF SI E FRUTA TABATA HABRI KABA ORA E BESTIA A KUMINSA KOME FO’I DJE.  Tuma nota ku barika hel tin bia ta kome e gotanan di suku riba e kaska di frutanan será.  Nota solamente un opservashon pa kada bestia i kada fruta (por ehempel si un mòfi ta bishitá e fruta diferente bia, bo ta menshoná solamente un bishita). Por fabor usa dos formulario si bo ta opservá dos diferente kaktùs na mesun momento.  RAPORTA SOLAMENTE BISHITANAN NA FRUTA CHIKITU TE MEDIANO, ku sigur no ta hechu. Prosedura pa

Entrega di informashon:

por fabor yena e formulario elektronikamente i mand’é pa Curaçao Footprint Foundation (info@curacaofootprint.org) despues kada seshon di opservashon. E fecha di klousura pa e estudio akí ta 30 septèmber 2013, pero nos lo keda semper kontentu ku bo informashon interesante despues di e fecha ei. Bo lo risibí un resumen di e resultádonan.  Nos lo tuma kontakto ku bo si nos mester di informashon adishonal.

Por fabor, wak potrèt di e kaktùsnan pa identifikashon.

Cincopa WordPress plugin

Leon Pors

About Leon Pors

One Response to “SIENTIFIKONAN LAIKO, NOS TIN MESTER DI BO!”

Read below or add a comment...

  1. Philip A. Rademaker Michelle Da Costa Gomez: Tur dia mainta i atardi nan ta pasa mi kurá na multitut, i ningun fruta di datu no ta haña chèns di hecha. Nan ta kome e flor di korona di La Birgen tambe, i e bonchinan di wabi ku indju.