Beyesa oraño

This post is also available in: Dutch, English.

E flornan spektakular di Bonchi Kabai

E flornan spektakular di Bonchi Kabai

Kòrsou ta birando seku atrobe, periodo di áwaseru a pasa i naturalesa riba nos isla ta den otoño. Blachi ta bira hel i kòrá, i ta kai for di e palunan den tempu rèkert. Mondi ta birando shinishi i sin koló i ta parse ku e palunan ta muriendo pa motibu di falta di awa. E sekura, vegetashon seku, bient’i Kuaresma duru i e santu di Sahara ku ta den laira ta okashoná un esfera deprimí riba nos isla. Tur eksploshon di koló inesperá den e paisahe no solamente ta atraktivo i ta yama atenshon, e ta okashoná serka nos nèki i maniobra straño ku nos outo.

Mes un kos a pasa awe mainta, ora nos tabata koriendo pa bai kas i a pasa e bario di Marchena/Wishi den proseso. Riba huki di e kaminda banda di e pòmp di gasolin tin dos palu pará, ku a yama nos atenshon un par di aña pasá kaba, pasobra ta trata di palu hopi skars riba nos isla. Bonchi di Kabai, òf Bonchi Kabai manera ta yama e palu aki na Papiamentu ta spesial. Kasi henter aña e palu no tin blachi, reakshonando asina riba e sirkunstansia seku ku nos tin pa gran parti di aña. Si awa kai, e palu ta yená ku blachi ku tin un forma di ruit. Den periodo ku e no tin blachi e karakterístika mas remarkabel ta sumpiñanan diki ku ta krese riba e tronkon, i tambe e strepinan vertikal ku e tin riba e kaska di e tronkon. Segun Arnoldo’s Zakflora e palu ta krese den wild na Aruba, kaminda e ta skars, i ta ‘verwilderd’ na Kòrsou i Boneiru. E buki Inheemse Bomen van Curaçao, Bonaire en Aruba di J. de Freitas ta bisa ku ta parse ku e palu ta introdusí.

E tronkon ku ta fasil pa rekonose, pero esnan aki no tei mas....

E tronkon ku ta fasil pa rekonosé, pero esnan aki no tei mas….

E informashonnan ta konfuso. Pero echo ta ku e palu aki ta krese den wild na Kòrsou tambe. Mas bien bisá e tabata krese den wild den e área ku yama Wechi. Den e área aki ta tin 4-5 palu di Bonchi Kabai mahestuoso, tur mas ku 5 meter di altura. Lo ke a keda di e palunan aki ta un par di portrèt no muchu bon. E palunan aki ta tin un edat altu di kisas mas ku 150 aña. Pero nan no tei mas, rosá sin mizerikòrdia dor di hende ku ke a sali for di diskushon, si e área mester a bira un área di konservashon si òf no, na un manera fásil i laf. Bou di komando di un mandatario di e tempu aya, ku a yuda destrosá un pida historia di nos isla ku un smile.

Mes un kos a sosodé ku e úniko palu di Bonchi Kabai ku keda pará kantu di e tereno de desaroyo na Veeris kaminda awor ta trahando un mall. Kantu di kaminda ta tin nèt un palu di Bonchi Kabai orguyoso a keda pará. Su orguyo no sirbi pa nada. Di tur e lugánan kaminda por a traha un kaminda pa drenta e tereno, naturalmente ta nèt einan e mester a bin. E palu aki tambe a bira historia.

'close up' di un sumpina

‘close up’ di un sumpiña

Di kon Bonchi Kabai ta asina spesial, banda di ku e ta un di e palunan fantástikamente adaptá na nos klima, a sali na kla awe mainta. I esaki a okashoná nos doló di garganta en maniobra ku outo: e palu en kuestion ku niun hende no ta pone atenshon na dje ta tin te den tòp un kantidat di flor grandi koló oraño. Nos nunka no a yega di mira e flornan aki ku nos mes wowo, i ainda nos no ta tin nan riba portrèt. Awor esaki si ta e kaso.

Lo ke ta partikular na e flornan aki ta e echo ku nan ta aparesé den lunanan di febrüari i mart (!) i asina ta forma un oásis den tempu di sekura kaminda nan ta mustra nan beyesa. Un beyesa oraño inesperá den un ambiente seku. Un lus ku ta duna di konosé ku lo ke ta parse morto, no ta morto!

Un eksploshon di kolo

Un eksploshon di koló

 

Michelle da Costa Gomez

About Michelle da Costa Gomez