Eksposishon potrèt di naturalesa

This post is also available in: Dutch, English.

Biblioteka Públiko lo ta esenario pa eksposishon “Bida den Sekura”, ku ta kuminsá 17 di febrüari i ta dura te 16 di mart 2013. Un eksposishon di naturalesa di Kòrsou ku un variedat di potrèt impreshonante. E eksposishon edukativo akí, ku ta inisiativa di Anna Rojer, ta presentá esenanan interesante i alabes bunita di nos flora i founa.

Novèmber 2012 Anna Rojer a kumpli dies aña ta organisá e kurso “Bida den Sekura” un kurso di ekologia básiko di Kòrsou. Un grupo di 14 kursista ku durante e dies añanan akí a partisipá na Anna su kurso a bai di akuerdo pa koperá kuné pa organisá un eksposishon ku e mihó potrètnan saká pa kursistanan i Anna Rojer. A forma un komishon i a logra haña Prins Bernard Cultuurfonds pa spònser e proyekto akí.

E eksposishon tin komo meta pa krea mas interes pa nos naturalesa, spesialmente bou di hóbennan, halsa sentido di responsabilidat pa nos herensia natural i konsientisá e bishitante di e diversidat di naturalesa di nos Dushi Kòrsou.

Nos ta invitá tur amante di naturalesa, públiko en general i skolnan en partikular, pa for di djaluna 18 di febrüari 2013 bin pone wowo riba potrètnan di Eksposishon na Biblioteka Públiko.