Natuurdagboek: Bòm lokal di vitamina 5: (H)Oba

This post is also available in: Dutch, English.

E tronkon di Oba. E palu ta krese kantu di un roi kaminda varios otro palu tambe ta bringa pa e tiki lus di solo ku ta drenta. En bes ku e palu a krese bai haltu, e palu a krese den un bògt pa hasi uso maksimal di e lus di solo.

E tronkon di Oba. E palu ta krese kantu di un roi kaminda varios otro palu tambe ta bringa pa e tiki lus di solo ku ta drenta. En bes ku e palu a krese bai haltu, e palu a krese den un bògt pa hasi uso maksimal di e lus di solo.

Un smak ku ta kombiná zür i zut, un kombinashon di koló oraño i hel i e ta skars na Kòrsou. Mayoria hende riba nos isla nunka no a mira un Oba, ni a yega di kome e fruta aki. Hopi biaha ta hende den nos komunidat di edat avansá i djis un par di hende di generashon mas yòn i ku gusta tende historianan i konosementu di nos grandinan ku konosé i por rekonosé e palu aki den nos mondi. Palu di Oba, òf Hoba (Spondias mombin) ta un palu monumental ku por bira mas grandi ku 12 meter altu (i tin sierto palu konosí ku ta mas ku 20 meter altu), i por atmirá e palunan aki na un skarsedat di lokalidat. Boneiru tambe tin un par di e palunan aki pero na Aruba e palunan a disparsé. E ta un beyesa skars ku frutanan dushi ku hende por kome. Tempu pa tira un bista riba e fruta lokal aki, i mas ainda awor ku nos ta temporada ku e palunan ta karga fruta.

Origin

Spondias mombin ta eksistí rònt e área di Karibe, Sur Amérika i Amérika Sentral tropikal i tambe na Afrika. Un kantidat di literatura Afrikano ta menshoná e mata aki komo unu ku ta introdusí pa hende riba e kontinente Afrikano, i ku esaki ta e motibu di e eksistensia di e palu aki riba e kontinente. Pero tin hopi diskushon pa ku esaki. Tin diferente biólogo ku ta mira e dispersashon di e mata aki pa diferente kontinente komo unu natural riba kua hende no ta tin influensha. E simianan di e frutanan lo a yega kosta di Afrika for di Sur Amérika pa medio di e diferente zeestromen. Tin indikashon fuerte ku esaki ta e manera ku e palu aki a yega na e diferente kostanan rònt mundu. Pero resientemente hende si ta tin influensia riba e dispersashon di e palu, ya ku a planta e palunan den diferente pais pa usa e fruta, blachi i uso den medisina tradishonal.

Blachi di Oba.

Blachi di Oba.

Remarkabel si bo konosé

Tin diferente área na Kòrsou, spesialmente kaminda di klep di kalki, kaminda bo por haña palu di Oba, e klep di kalki na Grote Berg, i tambe den e serunan di Knip, asina por lesa den e buki ‘Handleiding tot het gebruik van Inheemse en Ingevoerde planten op Aruba, Bonaire en Curaçao’ di man di Frater Arnoldo Broeders na 1967. Den Rooi Beru na Christoffelpark por mira nan den tur nan grandura, kantu di e kaminda pa bai den direkshon di seru Kristof i tambe den e serunan ku tin banda di e rooi. E ta un palu ku ta basta fásil pa rekonosé na su tronkon koló shinishi i maron ku kaska ku parse kòrki i riba kua hopi biaha tin beskein (korstmos) ta krese. E blachinan tin forma elíptiko ku por midi 5 centimeter pará huntu den un forma ku yama ‘geveerd” of forma di pluma na un taki ku huntu por bira 40 centimeter grandi. Partikular ta, ku semper tin 9 pa 19 blachi na un pluma di blachi. Parti ariba e blachi ta lombra i parti abou en ta mustra manera felpa. Den temporada seku e palu ta pèrdè su blachi hopi lihé i e ora ei por rekonosé nan solamente na nan takinan (grillig) i tronkon karakterístiko.

Dos fruta bèrdè.

Dos fruta bèrdè.

E flor, no mas grandi ku 5 milimeter, tin un koló krèm-blanku i nan ta huntu den u un pluma largu ku tin un oló fuerte, lo ke ta hasi nan hopi gusta pa abeha pa nan por traha honing. P’ései no ta nada straño ku den mondi hopi biaha tin nèshi di abeha den e palu òf den besindario direkto di e palu. Semper tene kuidou ora bo ta den proksimidat di e palunan aki.

E fruta di oba tin un forma oval i parse un preimu hel. Ora e fruta hecha e ta bira koló oraño-hel. E karni no ta masha diki, hopi biaha djis un par di milimeter. E simia ta empaketá den un flishi manera kòrki ku parse e flishi ku tin rondó di netumuskat i sa yama foelie. Ta e material aki ta duna e simia e posibilidat di drif riba awa i asina biaha bai rònt mundu den laman.
E karni di e fruta tin un smak zür te sut-zür i parse e smak di makaprein, un fruta ku mayoria biaha ta importá na Kòrsou di Venezuela, i tin biaha por kumpra den supermarket.
Den jungla di Sur Amerika, kaminda e palu ta eksistí na granèl, ta animal grandi ta hasi e trabou di dispersá e simia dor di kome fruta i guli e pipita henter. Makaku i otro mamífero grandi ta kome e fruta i ta saka e pipita den nan pupu na un otro lugá. Asina e mata ta sprèit.

Un kolekshon di fruta di kua unu a hecha kompletamente

Un kolekshon di fruta di kua unu a hecha kompletamente

Vitamina

Oba ta riku na vitamina manera vitamina C i vitamina B1 i ta usa e fruta na hopi pais den pa traha djus, icecream i djèm in mucha gusta kome nan. Tambe ta traha bebida alkohóliko di e fruta i ademas na Mexico ta prepará e fruta bèrdè den vinager pa despues kome nan manera oleifi. Tambe ta usa e fruta pa duna bestia kome.
E blachi ta kome manera vegetal. Na Thailandia ta prepará nan den diferente kuminda.
Investigashon sientífiko pa identifiká e vitamina i mineral den e blachi di e palu a demostrá ku e kuminda ta riku na fibra i proteina. Asina e ta forma un adishon sano den kualke dieta. 100 gram di blachi di e palu di oba tin un promedio di 11 miligram di kalsio, 9.5 miligram di potasio, 58 miligram di vitamina C i 5.6 miligram di vitamina A. E fruta tin un promedio pa kada 100 miligram di karni:  37 miligram di vitamina C, 31 miligram di kalsio, 2.8 miligram di heru, 31 miligram di fosforo i e ta riku na Vitamina A.
Pa kompará, un adulto mester di un promedio di mas o menos 70 miligram di vitamina C, 1000 miligram di kalsio, 15 miligram di heru i 700-1400 miligram di fosforo pa dia.

Medisina

Palu di Oba tin vários nòmber tur kaminda na mundu. Den Creool ta yam’é gran monben òf monben fran, na Ingles ta yam’é hog plum òf yellow spanish plum, na Franses mombin jaune, na Portugues acaiba òf pau da tapera, na Spaño hobo, òf jobito. Na Surnam e ta konosí komo Mope. Na diferente pais ta usa e palu aki den medisina tradishonal. Na Mexico ta traha un té di e flor i blachi pa yuda kontra doló di stoma, walmentu di stoma i infekshon di wowo i garganta. Ademas ta us’é pa yuda herida sana mas lihé.
Den pais Afrikano manera NIgeria tambe ta usa e palu den remedi tradishonal i tin vários investigashon sientífiko ta ser hasí pa haña sa mas di e karakterístika nan di e mata.
Pasobra tin vários supstansia den e blachi, kaska i otro parti di e palu ku tin funshon kontra di epilepsia, anti sikótiko, anti viral, anti bakterial i ku ta yuda kontra di envehesimentu. Tambe tin funshon konta habrimentu di barika i malaria.

E simia di Oba rondoná ku e flishi manera kòrki ku ta duna e fruta e abilidat di drif riba laman.

E simia di Oba rondoná ku e flishi manera kòrki ku ta duna e fruta e abilidat di drif riba laman.

Unda bo ta haña un palu di oba?

Oba no ta un palu ku bo por kumpra na kualke sentro kaminda ta bende mata. Si bo ke e palu aki den bo kurá bo mester stèk e palu, ku ademas tin e benefisio ku e palu lo pari hopi mas lihé. Tambe por sembra e simia den un pòchi ku tera fértil. E pòchi tin ku para na un sitio ku solo i mester mu’é regular. E simia por tarda di produsí e mata chikitu. Tin idea ku esaki ta pa motibu di e periodo ku e palu ta karga fruta normalmente.
Pasenshi ta un virtut!

Michelle da Costa Gomez

About Michelle da Costa Gomez