Krabèchi (Nyctanassa violacea)

This post is also available in: Dutch, English.

yu di Krabèchi na soño

Pòrtret di Denis Muys

Tin biaha ora bo kana den sierto área di naturalesa bo por hañabo ku un sorpresa inesperá, manera e sorpresa ku Denis Muy a haña su mes ku ne ora e tabata bishitá e área di Boka Tabla na e kosta salbahe di parti nòrt di nos isla Kòrsou.
Perfektamente kamuflá den su medio ambiente, e yu di Krabèchi aki tabata na soño, un nesesidat despues di lo ke sigur tabata un anochi yen di trabou pa por haña kuminda. Ounke e animalnan aki mayoria biaha ta keda den besindario di laman, ta mas usual pa enkontrá nan den of rònt di e awanan plat ku tin entre rais di palu di mangel i kantu di e kosta na parti sur di nos isla, kaminda ta mas fasil pa fangu kuminda.
E espesie di para aki ta unu ku ta brui riba tur e seis isla di lo ke anteriormente tabata Antiyas Hulandes i ta yamé Geelkruinnachtreiger na Hulandes i Yellow Crowned Night Heron na Ingles.
E yu di para aki tin un koló maron ku marka blanku, pero e adulto tin un koló blòu-shinishi ku kabes pretu i korona hel.
E dieta di e animal aki ta konsistí di guengu i otro kangreu, i tambe piská i asta lagadishi i insekto.