Beyesa inkomparabel

This post is also available in: Dutch, English.

Jan Kok den un temporada mihó

Manera ta awe mi ta kòrda kon, huntu ku algun amigu, mi a bai hasi un ultimo paseo den e area di Jan Kok, promé mi bandoná Kòrsou pa bai kuminsa ku mi estudio na Hulanda.

Mi ker’a graba tur kos bon den mi memoria pa asina mi no lubida e beyesa di mi isla. Ainda mi ta kòrda e gritamentu di algun prikichi bulando tras di un warawara, e zonido di e olanan kibrando riba e barankanan lagando asina e holo di laman penetrá den henter e area. Tampoko mi no por lubida e flamingonan ku elegantemente tabata kana den e saliña. Ratu ratu nan tabata habri nan halanan hanchu asina mustrando nos nan orguyo. Beyesa tan impreshonante pero alabes asina fragil ku kasi e ta obligabu pa proteh’é.

Yegando mas serka di e saliña m’a ripara kon un zeeanemoon a trèk su tenglanan paden ora mi sombra a pasa riba djé. ‘Esei si ta straño!’, m’a bisa mi amigunan. ‘Semper m’a kere ku nan ta reakshoná solamente riba kontakto fìsiko!’. Mi amiga a bira bisami: ‘Bo no sa nunka, kisas ora abo bin bèk for di Hulanda bo por bai studia e ékologia den e area aki….

Ku e ultimo palabranan akí bisá, e imagennan i eksperensianan bon grabá den mi kurason, mi a bandona mi isla ku e deseo pa un dia regresá.

Un bista sumamente tristu

Loke mi a kaba di deskribí kisas ta zona manera un kuenta fabriká. Sinembargo mi ta kere ku hopi ta esnan ku por bisa ku nan a mira i eksperensiá e mesun kosnan durante nan kaminatanan den e area di Jan Kok. Ku doló na mi kurason mi a tuma nota di e artíkulonan den korant, riba internèt i notisia na televishon tokante e desaster ku a tuma lugá den e area akí augustus ultimo. Durante mi promé fakansi na Kòrsou mi mester a mira e destrukshon ékologiko i kulturál históriko den e area di Malpais (bou di kua e tereno di Wechi tambe ta kai). Awor esaki.

Manera spesialistanan ya a bisa, lo bai dura años promé e naturalesa den e area aki rekuperá na su estado anterior. Apesar di e echo ku e balor di nos naturalesa, (e base di nos eksistensia riba mundu) no por wòrdu interpretá den ningun moneda , tòg nos ta trat’é asina kon ku ta. Riba un isla manera Kòrsou, e lasonan ku ta tene e sistema ékologiko huntu ta hopi estrecho. Riba esaki ta bin aserka ku tin algun organismonan ku ta eksistí solamente den e naturalesa di Kòrsou. Nan ta e bèrdadero yunan di Kòrsou. Unabes ku nan keda ekstinguí ta riba potrèt so nos por laga nos ñietunan wak nan.

Na momentu ku e lasonan den e sistema ékologiko keda destruí, e sistema ta bira asina suak ku ta solamente un kuestion di tempu pa mira kon tur kos lo basha den otro. Ta akinan nos ke yega? Akaso un sistema di ékologia salú, lo no trese mas benefisio pa nos komunidát? Mi ta konvensí ku e kontesta riba e ultimo pregunta aki ta ‘SI’!

Lasonan ékologiko (i ekonómiko) den un saliña

One Response to “Beyesa inkomparabel”

Read below or add a comment...

  1. ivonnely. says:

    Na momentu kumi a tende e kos aki ela duelmi tambe,paso mi ta sinja den toerime ,anto mi ta sinti den mi kurason ku e kos nan di korsou ta parti dimi bida ,mita hanja hopi jammer ku algu bunita di korsou anto hopi bunita tin ku bai perdi,korsou ta 1 beyesa pero tremendo beyesa anto e parti aki tbt 1 parti bunita pero bunita mes 1 tin ora kubo ta splika hende di korsou bono tin palabra pa bisa nan kon bunita e luga aki ta ,anto mira kiko a pasa ,Mi ta korda na kanal 8 mi a mira 1 MR ta planta magrove den laman bek paso e laman mester di e kosnan aki , I mira su resultado awoki 1 trabou pornada, pero laga nos ban sempera ku eno ta tuma hopi anja mane nan ta bisa ,Misa ku hinter korsou e kos aki a duel,I ahinda esun ku sa kk ta nifika heresia