E peliger na bela

This post is also available in: Dutch, English.

Pèchi portugés

Tur aña, durante e periodo entre Karnaval i Pasku di Resurekshon, ku den boka di pueblo ta konosí komo tempu di kuaresma, e patronchi di bientu den nos region tin e tendensia di bira iregular. Dor ku bientu ta bira mas den direkshon sùit, esaki ta okashoná un bishita na nos isla di un organismo sumamente straño, un bishitante ku mayoria biaha nos no ta kontentu ku n’e. E organismo aki ta pertenesé na e ordu di siphonophora, un palabra ku ta pará pa animal ku tin ‘pipa hol’. E organismo tin e nòmber sientífiko Physalia physalis, i ta mihó konosí komo Pèchi portugés.

Pa ta eksakto e Pèchi portugés no ta un animal riba su mes. Biologikamente e ta un kolonia di organismo ku tin e nòmber ‘hydroïden‘, ku ta di tal forma organisá ku tur a haña un trabou spesífiko. Tin sélula ku ta traha riba digerí kuminda, otro ku ta funshoná riba e parti di reprodukshon, un sélula ta e blas kolo lila i ros ku ta yená ku gas pa asina e por drif riba awa ( e ‘holle buis’) i e asina yama ‘nematocysten’, ku ta e sélula ku ta duna asina tantu miedu i ku ta pegá na e tentakulonan largu ku ta kologá na e organismo, na Hulandes yamá ‘netelcellen’. E tentakulonan aki por wòrdu retraktá, i den estado di rèk nan por tin un largura di asta 30 meter largu, na un kolonia ku ta basta grandi. Esaki ta hasi e Pèchi portugés asina peligroso pa landadó. E sélula aki (‘netelcellen’) e organismo ta usa pa defendé su mes i tambe pa e kue presa dor di hasi nan lam. Tòg tin un tipo di piská ku a adaptá su mes di tal forma ke ela bira insensitivo pa e venenu den e sélula. E piska aki ku nan ta yama ‘oorlogschip-visjes’, Nomeus gronovii, ta biba entre e tentakulonan di e Pèchi portugés i ta kome e restunan di e presa ku e kolonia a kue.

Pintura di un nematocyst; e hilu lorá i e hak ta visibel.

E blas ku ta drif riba superfisie di awa ta hopi sensitivo pa bientu i ta hasi henter e kolonia sensitivo pa esaki. I esaki ta e motibu ku nos ta haña nan na parti sùit di nos isla ora bientu bira mas sùit. I e parti sùit di nos isla ta kaminda nos playanan ta kaminda nos gusta landa. Normalmente ta mira nan únikamente de bes en kuando na banda nort di nos isla. E kuenta ku nan tei solamente den tempu di kuaresma no ta bèrdat.

Un ‘nematocyst’ of un ‘netelcel’ ta konsistí di un saku mikroskópiko ku un hilu lorá aden ku ta kaba den un angua ku diferente hak. E sélula aki ta semper bou di preshon. Si un presa òf landadó ta mishi ku e hak di e sélula, e sélula ta kibra habri i ku un spit enorme e hilu ku e angua ta sali den direkshon di e víktima. Ora e víktima haña kontakto ku esaki un venenu potente ta ser inyektá. Ora mishi ku e organismo, masha hopi, tin biaha asta mas ku shen, sélula ta ser aktivá, ku konsekuensia un doló intenso i formashon grandi di blar.

Pèchi portugés riba playa, ketu bai peligroso!

Sin embargo, i apesar di e reputashon malu ku e animalnan straño, pero tòg partikular tin, nan manera di biba dor di drif riba awa ta un bentaha pa landadó. Por mira nan sumamente bon. E konseho ta simpel, si bo mira un blas ku kolo ros i lila ku ta drif riba superfisie di awa, sali for di awa inmediatamente. “Better safe than sorry!” I si sinembargo bo drenta den kontakto ku e ‘netelcellen’ tòg, ta konsehabel ba bishitá poli pas pronto ku ta posibel.
Ademas no mishi ku un Pèchi portugés, ku ta drumi riba kosta, i keda leu espesialmente di e tentakulonan. E sélula venenoso por keda aktivo pa vários dia, aunke e kolonia mes ta mustra kompletamente morto i seku.

Leon Pors

About Leon Pors